DOOD FURAN: Labada Shariif Makala Hari Karaan?

Labada Shariif (Shariif Axmed iyo Shariif Xasan) waxay weli yihiin rag dhinacyo badan iskaga xiran, una muuqda isku dan illaa hadda , wayna dhici kartaa in siyaasadda wax badan ka bedeshay labada nin maadaama beryahan dambe labaduba ay wada rabeen madaxweynanimo.

Kaliya ma ahan in ay ka wada yimaadeen isbahaysigii Asmara ee mucaaradka ku ahaa dawladii hore ee KMG ahayd, waa isku magac waxayna wada xirtaan KOOFIYADO isku mid ah illaa hadda.
Khilaafaadkii faraha badnaa ee soo maray hogaanka DKMG ahna, waxay had iyo jeer labada nin ka istaagi jireen isku mowqif si ay iyaga u soo haraan oo xilka aysan u waayin illaa 2009. Markaasi dad badan ayaa u arka in labada Shariif yihiin weligoodna ahaayeen saaxiibo fiican oo dantooda yaqaana.

Laakiin hadda sheekada ka duwan tii hore. Markaad u fiirsato sida wax u socdaan doorashada hadda loo diyaargaroobayo tusaalana ka dhigato doorashadii afhayeenka baarlamaanka oo xulufada Shariif Xasan si ku talagal ah dhulka loola simay awoodooda, inkastoo Shariif Xasan uusan weli quusanin. Waxaase isweydiin midan dhowr arimood.

Marka hore, way cadahay in Shariif Xasan soo geli Karin tartanka madaxtinimada oo waxaa taas albaab ku noqotay doorashadii Prof Jawaari, hase yeeshee waxaa u furan waddooyin kale oo uu dheesha siyaasadda kaga qeybqaadan karo, waayo Shariif Xasan weli baarlamaanka gudihiisa wuxuu ku leeyahay awood muuqata oo tiro ka badan 60meeyo xildhibaan oo XERTIISA ah ayaa baarlamaanka dhexfadhida waana tiro ku filan inuu ku gorgortamo haddii la gaaro doorashada madaxweynaha. Hana hilmaamin in isaga qudhiisu uu yahay xildhibaan oo kaliya uu sugayo inta xildhibaanada cusub iyo baarlamaanka cusub uu ka baranayo.

Shalay [Talaado] markii doorashada afhayeenka ay soo dhamaatay ayaa C/weli Gaas oo ay dhowaan xulufo ahaayeen uga tacsiyeeyey Shariif Xasan guuldaradii ku dhacday Cali Khaliif Galeyr oo codka uu siinayey si uu gudoomiyaha baarlamaanka ugu guuleysto. C/weli baa si kaftan leh u yiri “Waan kuu halmbalyeynayaa Shariif”- Shariif Xasan wuxuu kaga jawaabay “Ha welwelin waan israaceynaa dhamaanteen!!!”

Dabcan Shariif Xasan way muuqataa inuu gorgortankiisa ka fiirsanayo hadda, laakiin waxaa sida xubnaha isaga ku dhow ay qabaan uu ka hormarinayaa sidii uu u abuuri lahaa jawi aysan saaxiibadiisa [C/weli iyo Shariif Axmed] uga badbaadin dabinka uu isagu shalay ku dhacay. Marka su’aashu waxay tahay LABADA SHARIIF MA KALA HARI KARAAN?

Dadka qaar baa sheegaya in Shariif Axmed uu yeelan karo cudurdaar uu kaga haro Saaxiibkiis oo ay ugu weyn tahay in beesha caalamka rabto nin beelaha Muqdisho ka soo jeeda oo madaxtinimada yimaada si ugu yaraan aaney dib ugu dhicin dagaalkii lagula jiray Al-Shabaab iyo u dhega nuglaanta shisheeyaha. Hana ka tagin in Shariif Axmed ahaa nin markiisii horaba ka yimid kooxihii Maxkamadaha Islaamiga oo Al-Shabaab ka soo dhex bexeen.

Beesha caalamka waa run inay hadda ka fekereyso waxa uu noqon karo shakhsiga cusub ee MADAXWEYNAHA ka noqonaya dalka iyo waxa uu la iman karo, Haddiise doodaasi sax tahay waxaa sidoo kale la isweydiin karaa suurtagalnimada in la raadiyo shakhsi kale oo isla beelaha Muqdisho kasoo jeeda kana duwan wajiyadii hore loo arki jiray- tusaale waxaa loo qaadan karaa isbedelka doorashada baarlamaanka oo saddexda gudoomiye loo doortyay rag wada cusub- suurtagalna in doorashada madaxweynaha jidkaasi oo kale marto- waa tii la yiri wixii cusub caalamka jecel.

Markaas cudurdaarka loogu marmarsiyoon karo ceyrinta Shariif Axmed waxaa noqon kara in uu ka mid ahaa raggii lagu eedeeyey musuqmaasuqa iyo in dawladii uu madaxda ka ahaa lumisaay fursado ka badan inta ay qabatay ayna la degtay musuq iyo tayo darro khasaarisay dhamaan dadaaladii beesha caalamka ay ku bixisay hanaanka nabadda ee Soomaaliya.

Haddaba su’aasha waxay tahay “LABADA SHARIIF MA KALA HARI KARAAN? Mise way israaci doonaan oo dib danbe looma maqli doono magacyadooda… WAA DOOD FURAN.

=================

The only reason for being a professional writer is that you can’t help it.

Posted on August 30, 2012, in Anti-Tribalism. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: