QABYAALADDIID: GABAY

Qabyaaladda iyo Soomaalida (sawir gacmeedka Amin Amir)

Qabyaaladda iyo Soomaalida (sawir gacmeedka Amin Amir)

Gabaygan Qabyaaladdiid waa gabay aan ku tix gelinayo abwaankii caanka ahaa Alle naxariiti jano ha siiyee abwaan Cabdullaahi Suldaan Tima Cadde, oo si kooban kelmado dhaxal gal noqday ka yidhi Soomaalida iyo qabyaaladda. Gabaygaa Tima Cadde waxaa ka mid ah meeriska “dugsi maleh qabyaaladdi, waxay dumiso mooyaane”

Abwaanku gabaygaa wuxuu mariyey waqtigii ay Soomaalidu ugu qabyaalad yarayd oo ahayd 1964tii ilaa 5tii. Hadduu Tima Cadde maanta joogi lahaa oo ay ka soo wareegtey 50 sannadood, tolow muxuu odhan lahaa? Hadduu sidayda oo kale maalintaana joogay wixii ka dambeeyey oo dhanna ogaan lahaa xasuuqa , , qaxoontiyada, raja beelka, dhaca iyo boobka , oo xaadir ahaan lahaase muxuu odhan lahaa?

Aniga siday ila tahay maba hadleene waa aamuse lahaa, oo isha ayuu mirig ka siin lahaa.

Gabaygana ulajeeddo Qabyaalad diid wuxuu sheegayaa oo abwaan Timacadde ildheeridiisa iyo in hadalkiisu ahaa digniin, waxa soo socda. Waana aragaa wuxuu ka digayey.

Tuducyada ugu dambeeya waxay ka warramayaan sida sida uu Ebbe inoo sheegay Qauraanka Kariimka ah, suuradda (Cabasa Aayadaha 33 – 37) in Aakhiro oo iyadu lama huraan ah, in qabyaalad daaye qof waliba ka carari doono aabihi iyo hooyadi, caruurtiisa walaalihi, iyo axsaaibtiii .Iyadoo maalintaa qof walba dhibkiisu gaar u yahay,

Gabayga waxaa ku hal qabsaday Cabdi, oo ah saaxiibkay Cabdi kariim Cabdirahmaan X. Xasan.

Qisaduu abwaan qaali ahi, geliyey qaamuuska

“Dugsi maleh qabyaaladi waxay, dumiso mooyaane”

Qiyaastuu ka wadey haatanay naga qarsoonayne

Qarqarsigan Ibliis nagu qabtaye, nagu qasbee taagan

Qabbirada lugaha noogu xidhan, qoofalka adkaaday

Ee qoorta noo sudhan sidii, qoolka kiristaanka

Ay naga qashaafeen dadkii, qaaradaha joogay

Qaxarkiyo dhibaatadu Cabdow, waa qabyaaladda e

Qalalaasahaa taagan iyo, qaladdadaa raagay

Qaranimo la tuuray oo dadkii, qoorta laga gooyey

Ubadkaa qushuucsane addoon, xero u qoondeeyey

Qurbahaa la soo sahansadee, qolobo meel aadday

Baddan lagu qarqoomaye Cabdow, waa qabyaaladda e

Iingiriis siday qaar yihiin, qaybintaa darane

Qoqobaha kuwaa soo xidhaye, qoobadda xariiqday

Isla qumanayaashaa dunida, qaladka gadhsiiyay

Anagana qamuunyada ilkaha, qam isku siinaaya

Waxay annaga nagu qoonsadeeen, waa qabyaaladda e

Dad qarriban ma qaataan xaqiyo, qawlka Eebahaye

Quluubtooda waa laga xidhaa, qayrka oo idile

Haddaad qaylisaan iyo haddaad, qalin darraysaanba

Marna kuma qancaayaan murtida, qarada waaweyne

Lagala quusay dhegihii qafilan waano loo qoro’ e

Maalintii qiyaamuhu dhacee, qaadir la hor joogo

Dadkoo qaawanaan tuban markaan, cidi qarsoomaynin

Ee qaaba qowseen khalqiga, qorraxda loo keeno

Qareen uma diraayaan dadkii , qaali la ahaaye

Kuwa kala qarsoonaanta jecel, waa qaraabade eh

Antitribalism

Posted on July 10, 2015, in Anti-Tribalism. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: